Page 29 - Brenn_2020

Gedichte 2020 Hubert Brenn (Längenfeld im Ötztal)

Bilanz

I konn mit mr zefridn sein und brauch mi nit beschwern
i hon eppas lernen kennt und oftr ö eppas wern
i hon eppas auf di Fieße drschtellet und weitar brocht
daß i amol sövl zewege bring, i hatt mrs nit gedoch

I hon mr genüeg fiergenömen, obr nuicht drzwungen
atie eppas ischt wöll drnebm gongen, obr ö vil gelungen
apormol ö gröeße Wirfe, i hons et salt foscht nit kennt glöbm
i hon mi öerdelach ins Zuig gelet, a riewige Kugla hon i nie gschöbm

Obr wie weit i ö kemen bin, es hot mr nie gonz geglonget
es hot olm widr nuie Zile gebm, i hon mr olles ovrlonget
atie hots wöll an Schtölprar gebm, olm hobm se mi nit weitar gelot
weitar kemen bin i lei nit, wenn man mr Prigle zwischn di Fieße
gschmissn hot

Wenn dr Haufn ze gröeß werchrt dribr ze schteign, bleibet man freilach
schtean
und oftr amol is fier gewesn, es hot gehoeßn: iez konnschte gean
i hon meine sibm Zweschschpen gepocket, wos mr züegschtondn ischt, mit
genömen
lei oes, hall hon i nie augeherchrt und tües olm nö: oefoch trömen
Hot sis ogetrogn?
Öfte kemen mr iez sella Frogn
wie: hot sis wirklach ogetrogn
wos i mr ongeton und fier wos i mi ingsetzet hon
mi dunket, i hon atie eppas ummensischt geton

Es hot nit olm, wos gsellt hatt, außa gschauget
atie eppas hot nit, wie gemoet, getauget
und ob und züe ischt eppas töll drnebm gongen
drum denk i mr et: i hatt vil nit gebrauchet onfongen

Seite 29