Page 20 - Oberhauser

Gedichte Basilius "Silli" Oberhauser

De bodenständige Kost

Brodakropfn essn is heut jo modern,
mit Messa und Gowi tans de bessan Herrn,

mia tatns a so owa gor nia schmeckn,
i muaß scho an Broda nu vo de Finga owaleckn.

So richtig tränig, so miassns sei,

des is a Kost, auf de i mi gfrei.
A Breznsuppn, oda gor amoi Bladl mit Kraut,
dazua a Budamüch, dass ma´s leichta vadaut.

Kasspatzl mit vü Schnittlach, dia wos se ziachn,
da Kas mog ruhig a bissl stärka riachn.

A Tirggnwixa mit Granggln oda Koch,
zan Fruahstuck a Hunkbrot, des mog ma doch.

A Miasl, do is gleich, wias ukricht is,
a Wossasuppn und Daumnidä, des mog oana gwiß.
Ruahnudln mit a guata Marmelad,
a be Fostknödl heb´s oan nit recht stad.

A Kröstl mit Krautsalot, a bochne Nudl,
wia guat is eascht a zochna Äpfistrudl.

A mit an Hollermandl und Moosbeernockn
brauchats oan nit narrisch long lockn.

A Brennsuppn muaßt kenna, sist tuat´s nit megn,

guate Pressknödl bring nit jede Köchin zwegn.
Kasknödl, a Ruabnkraut oda gor a Geascht,

wo a Stickä Gsöchts oafoch eichi keascht.

De Speckknödl hät i decht boid nu vabessen,
des is´, was mia Brixntoia am liabstn essn.

Seite 20