Page 9 - Rossa 3
P. 9
Gedichte Joseph Rossa
Enzian
De Wiesn is no ned ganz wach
Sie döst im Frühjahrslicht
Da Krokus scho so nach und nach
Dös öde Braun durchbricht.
Da siech i grad zwoa blaue Stern
Ganz eineduckt, versteckt
De in zwoa dunkle Augen ghörn
No hat sie neamd entdeckt.
I schau sie on und denk mir glei
Dös is a rechter Platz
Am Sunntig kimm i na vorbei
Und zoag euch zwoa mein´m Schatz.
Ihr Aug hats gleiche Blau wia ihr
Und aa den tiafn Grund
Und aa so offen scheints ihr mir
So wia ihr weicha Mund.
Seite 9
