Page 12 - Brenn_2020

Gedichte 2020 Hubert Brenn (Längenfeld im Ötztal)

I kimm öfte numma mit

Hie und do kimm i oefoch numma mit
wos si olles tüet und oschpilt, vrschtea i öfte nit
es ischt jo schier nit ze glöbm, wos si do wie det olles tüet
man konn drzüe schtean, wie man will, obr nit olles ischt güet
In dr Pölitik schpilt si olleweil ollerhond o
si kemen und gean und sein oftr widr do
apor leischtn nit vil und kinntn si decht olles leischtn
si tien decht olle, wie se welln, sall drziernt mi an meischtn
Obr wos sells, ze wose reg i mi eigntlach au
es nutzet e olles nuicht, olle pfeifn se drau
gleich, öb se si gegenseitig auhn hebm ödr owatschn
es sein an olm genüeg umha, die züeschaugn und klatschn

Seite 12