Page 97 - Rossa 4

Gedichte Joseph Rossa

Das Platzkonzert

Am Samstag abnds is Plotzkonzert
So wia se des für d´Musi ghert

Für Einheimische, und für de Gäst

Macht ma im Frei´n a Musikfest

A ältrer Herr sitzt do und lost

Auf des wos de Kapelle blost
A weng nervös de Musi ist

Der ältre Herr is Komponist

So manchesmoi do zuckt er leicht

Wenn s´Flügelhorn s „c“ ned erreicht
An Riss gibt’s eahm in seinem Gsicht

Wei de Posaun so aussasticht

Fast hättsn vo seinm Sessl gwischt

Wia Loisn auf de Tromml drischt

An Jammerer tuat er ganz laut
Wia Franzerl mit de Beckn haut

An tiafn Seufzer macht er schon

Beim Patzer vo dem Bariton

Er stöhnt ois ob er Rheuma hätt
Beim Gigser vo da Klarinett

Er zittert vo dem Durchanand...

Obwohl am Schluß warn sie beinand

Und stolz sie auf den Ehrngast schaugn

Und der hat Tränen in de Augn

Seite 97