Page 45 - Rossa 4
P. 45
Gedichte Joseph Rossa
Rosenkranzbeten
Mitm oldn Huaber geht’s zu End
drei Tog schun wartens drauf
er selwa möcht ja aa gern giahn
lei´s Herz des hört nit auf.
De Motzer Nann und d´Raunzer Lies
wos Nachbarinnen sein
oft betens eahm an Rosenkranz
und schluchzen mittendrein.
Sei Enkl, s´Michal geht daweil
zum Bäcker um a Brot
de Bäckerin frogt teilnahmsvoll:
„Isch iatz da Opa tot?“
„Naa“ sogt da Michl voller Grant
„des geht se no nit aus
de Tratschn mit ihrm Rosenkranz
de bringnan decht olm draus...“
Seite 45
