Page 45 - Brenn_2020
P. 45
Gedichte 2020 Hubert Brenn (Längenfeld im Ötztal)
Menschnersotz
Dr nuieschte Schrei, man glöbets schier nit
ischt a Pöppa, tien konn man olles drmit
foscht wie a richtiger Mensch schauget se aus
und olm mea höln si oene ins Haus
„I hon oene fier olle Gelegnheitn
konn olles tien drmit außer schtreitn“
hot oer gset, ieznt hobm ses in Fernseahn brocht
i hon mr wöll mein Toel drbei gedocht
Jo, weit is mit ins Menschn breits kemen:
weils mit Leitnen nit klor geat, mießn mr Pöppen nemen
dissall konn man oschtelln und oftr weck legn
a wirklacher, lebendiger Mensch ischt holt atie ö drgegn
Weil mans mit echtn Leitnen olm letzar konn
kemen iez Maschinen, Röböter und Pöppen dron
eppas zen Inscholtn und Ausschteckn holt
und: si nutzn si lei o, wern obr nit kronk ödr olt
Seite 45
