Page 13 - Microsoft Word - Geschichten
P. 13
Geschichten Joseph (Sepp) Rossa
Herbschtln tuats
Jetzt is sie also wieder da de stille Zeit, die Zeit wo´s in der Höh´ obn einsam
werd, de Anger und Wiesn verlassn sein, der Haag leer und de Sennhüttn Tür
und Fenschter verriegelt habn. Von weit unt´ hört man no a paar Glöckla aua,
von hungrige Schaf´ de sich no a feins Herbschtmenü zammensuachn.
De Moosbeerzettn habn b´reits kupferroate Pölschter ums Jungghölz glegt und a
vagessne Glahn funkelt aus de Schröfn aussa wia a Rubin am Hols von am schian
Weibas. Da Hoadach hot auf da öbern Seitn a Dunkelroat wia de Wangen vo da
Mam wenn sie ban Bachn am Heaschd zuache steaht, und untabei sein so kloane,
zarschte, hellrosa Röasla, wia de Wangalen bei am junga Diandla.
Brinnroat wachtelt a Brombeerlabl dem Summer a Pfiat God zua und a
vakrüpelte Birkn laßt ihre gelbn Blattla wia goidene Herschzla im Herbschthauch
wirbeln.
A vagessnes Margritl steht traurig am feuchten Wegrand und hofft immer no,
daß a jungs Dianei käm und ihr de Blütnblattla auszupfat....er liebt mich....
er liebt mich nicht....er liebt mich...
Wia brennende Fackeln stiahn vaeinzelt langhaxade Larchn zwischn de dunkler
werdenden Fichtn, a buschige Zirbn schmeißt ihr leschts Zirbnnüssl ochi trifft
aber nit amol de müade Maus de in de fahle Sunn blinzelt, sinsch aber tuat olls
a Raschtl, de ganze Welt daherobn wead staad und schnauft tiaf aus nach der
getonen Arbat.
Lei der Plotzhirsch reißt a Loch nei in de Stille mit seinm tuiflischn Röhrer, daß
eahm da Otem ganz rachig werschd und de kloan Bamla zan zittern onhebn. De
Hiaschküah schaun au, blinzln sich gegenseitig zua, schütteln spöttisch de Köpfla
und äsen unbeeindruckt weiter. Wias hoit de Weiberleut aa tean, wenn sich oana
gor a so aumandelt.A dunkls Oachkatzl saust mit am Haslnüssl zu der vastecktn
Vorratskammer und, no halb Wiesl und scho halb Hermele huschts über de
kurzgfressna Wiesn, daß a vaschlaffne Amsel daschreckt in de Höh´ flattascht
und laut ihrn Protescht naus schlogt über de Störung und nit vasteht wia mans
um de Zeit no so gnädig habn kunn.
Seite -12-
