Page 28 - Wieshofer
P. 28
Gedichte Marianne Wieshofer
Der Hörest is da
Ja allwei wenn der Hörest kimmb,
das ziachts mih hin zan Wald,
wil mir die ganze Farbmpracht
halt oafach sofi gfallt.
Die Lerchn stehn so mächtig da
im mattn, goidern Gwand,
a großer Moaster hat alls gmaln,
des wah sust neambt en Stand.
Bleib vor der altn Buachn stehn,
mih greit er so, der Bam
und do wird mir so bsuna z'muat
wia wenn ih Abschied nahm.
Zerst habm mih die grean Blattl gfreit,
send gwest so zart und fein,
hon auf die Äst of singa ghört
und wischpen zwischn drei.
Die ganze Pracht, sie halt nid lang,
der Reif kommb über d'Nacht,
die Blattl falln...so hat er mih
um meine Freidn bracht.
Geht's ins im Lebm nit oft aso
wia da den farbigen Bam?
Ah 's große Glück, des halt nid lang -
's is ah oft glei a Tram.
Seite 28
