Page 29 - Microsoft Word - Geschichten
P. 29
Geschichten Joseph (Sepp) Rossa
Späte Triebe
Der wo mir dös Gschichtl erzählt hat muaß es genau wissen, weil er dabei war.
Sunst trauert i´s mir gar nit schreibn. Also da war amol...i glab der Namen is gar
nit so wichtig, dös kann ja an jedn passiern.
Als a Junger war er a rechts Luadaviech. Zug gspielt hat er und de Guitarr
gschlagn und so oana is der Fleischeslust natürlich scho sehr ausgsetzt. Obendrein
war er nit kloan und de kühne Hakennasn in seinm Gsicht hat eahm was vom
Speckbacher Josef verliehn. De kloan lustign Augn san wieselflink von oana zur
andern ghupft und de Diandla is er ganz schön weit ins Herzl einikemmen
damit. Dann hat er aber in a Hoamatl eingheirat und sei ganze Kraft is in der
Arbeit aufgangen.
Der Zug und die Klampfn san ungenützt am Dachbodn obn verstaubt und
höchstens amol hot oana vo de zwoa Buam, die eahm sei Bäuerin gschenkt hat,
dran umanand zupft. Aus dem Bauernstolz is langsam die Bankabhängigkeit
wordn und er hat ganz schön strappeln müassn um olm obn aufzuschwimmen.
Na ja und so vergeht de Zeit.
Zu seinm "60er" hat er dem ältern Buabn, der sich ganz guad anlassn hat, des
Sach übergebn und war auf oamal im Austrag. Er hat zwar no mitgearbeitet
aber de Verantwortung war doch weg.
Und da kimmt er mit so am Springinkerl z´redn und was eahm der verzählt dös
gfallt eahm. Er schleicht sich am Dachbodn nauf und blast amol den
zentimeterhoachn Staub vo seiner Zugin. Teufl eini de spielt sogar noch. Lei seine
Finger san a bissl zu ungelenk. Aber "Hänschen klein" und selle Sachn giahn scho
noch. Er nimmt dös Instrument mit in die Stubn und fangt an zu probiern. De
Bäuerin schüttelt zwar den Kopf aber de Sommergäst sein begeistert. Hin und
wieder kimmt der Andere mit seiner Guitarr und dann spieln sie zammen. Und
es macht ihm immer mehr Freud. Dann spät im Langs, die ersten Sommergäst
sein schon da, kimmt der Springinkerl mit einer verruckten Idee. Unten im
Campingstüberl in Weer, woaß er zu berichten, gehts adia abnds recht lustig zua.
Seite -28-
