Page 19 - Rabl 2

Gedichte Anni Rabl

Von Ess´n weascht müad und du legsti aufs Bett,
o ziach´n tuasti owa etz amoi net.

Du host ja go nit fü Zeit zon valia´n,

wei in a poor Minut´n bist dru zon massian.

Danoch is zon wieg´n und sist nu oiahond,

und zum ixtn moi muasst aussa von Gwond.

Du kimst etz as schwitz´n,es geht wieder u,
zeascht ziachsti o, danoch legsti schnö u.

Danoch legsti worm u und gehst a Runde spaziea´n,

donn ziachste schnö um,wei se toand scho serviea´n.

Zon Schnochtsess´n gibs nit gor a so fü,

danoch was zon tonz´n geha, wea hoit nu wü.

Danoch ziachsti o und sinkst eichi as Bett,

owa do geht´s scho wieder u, des gonze Gfrett.
Sogor im Schlof tramst a nu dafu,

du zichsti o und legst di glei wieda u.

Dös mit dia Kurschatt´n is a nit kot a Kred,

des söd´s scho geb´n, owa vuagschrieb´n weascht´s net.

De Prozedur is de gleich, do geht’s wiederum u,

a poor moi ziachste gonz o, und legsti donn wieda u.

21 Tog long de gleich Prozedur,
wei genau so long dauascht a Kur.

So a Kuraufenthoit hot scho gonz fü kuriascht,

ku jeder bestätting, dea´s söm hot probiascht.

Und söd de Notwendigkeit wieda besteha,

und es hoasst, auf a Kur wa krecht geha,

fongst hoit dahoam scho mit´n trainier´n amoi u,
a poor moi ben Tag, ziachsti o und leg s di u !

Seite 19