Page 33 - Rabl 2

Gedichte Anni Rabl

S´Fuaßgras

Des sog eh scho ois da Num,

dean Rasen haut fast go nix um.

De Kinna derfn'd drauf Fuaßboilln spü´n,

barfuaßat laff´n, an Morg´ntau füh´n.

Vo de Schweizal Kranzei bind´n,
so moncher Käfer is zon find´n,

Tischtennis und Federboi,

daleit s´Fuaßgras a oimoi.

Und weascht ausprobiascht des neie Radl,

bleimb vaschont de Knia und d´Wadl.

Wei foit oas um, foit's ja gonz lind,
und de grean Fleck vagehn'd e gschwind.

Und weaschts a diam recht eichi knet´n,

wos sicher a nit gfoit an jed´n,

nocha weaschta hoit wieder amoi gmaht,

und ad'Henna ois Fuattagros aufgstraht.

So ku sie da Kreislauf wieda schliaßn,

so a Fuaßgras tuat di nia vadriaßn.

Seite 33