Page 55 - Microsoft Word - Geschichten
P. 55
Geschichten Joseph (Sepp) Rossa
De Sabine...19 is sie wordn vor 2 Wochn....s´Sabinerl....eine Nacht habn mia
mitsammen verbracht, de Sabine und i...damals wia i mei Prostata abgebn hab is
sie an meinm Bett gsessn, de Nachtschwester Sabine. Blumen hab i ihr kauft
danach, dös schöne Lächln von einem jungen Madl wenn sie Blumen kriagt ohne
dass sie mit oanm ins Bett gehn muaß. Oamal is sie mit mir ins Theater gangen,
der verkaufte Großvater, frali kostet dös a Geld...aber liaba zahl i für dös Lachn
von da Sabine als wia da Schwiegertochter an Zuschuss für die Flugreise zu de
Bahamas. De ärgert sich sowieso weil i den Sonderangebotsschinkn vom Lidl nit
mag, sondern nur a Qualitätsware vom Hörtnagl. ---
A Kravattn hun i mia kauft...40 Euro....da hat sie´s Gsicht verzogn, geh Opa zu
was denn, hat sie gmotzt...ja freili Opa...umatoan tua
sie eh nit.
Zum Rentnerausflug hätts mi gschickt....de Schwiegertochter.… mach dir a paar
schöne Stunden, Opa, .freilich damit sie derweil mei Zimmer durchsuachn
kannt...
Freundin hab i aa koane...zu was denn a? De Lederäpfl hab i scho friaga nia gern
mögn, lieber scho an knackigen Klarapfl, aber de kann i a bloß no anschaun weil
i sie zweng meiner Prothesn nimmer dakui. Dabeiß. Und warum soll i mia a
Hennen eintoan nur weil i hi und da a Glust auf ein weiches Ei hab. So wia mei
Anna war gibts ja decht koane mehr für mi. Und so reicht mir de Freundschaft
mit meine Krankheiten. De werdn sowieso immer mehr.
Spaziern gehn tua i no gern. Iatz an Früajahr is ja soviel zum segn. De Fremden,
de von obm runter, de über insare Preise immer schimpfen, habn aa wieder
hergfundn, de Rockerl vo de Madln werdn no kürza, de Ausschnitte tiafa, dass
ma glei bis in de Vergangenheit siecht, und überoll werd wieder baut, und wenn
a Bagger seine Zähnd in de Erdn neigrabt und so a zwoa Meter langs Loch
aufton hat na denk i mir....ja, ja,....aber mein Löffl gib i deratswegn doch no ned
ab, grod z´Fleiß nit, do kennans no lang drauf warten.
Seite -54-
